روزا و المدونون

أثناء جلوسي باستمتاع لمشاهدة عرض فرقة الجميزة في حفل المدونون لاحظت جلوس شخصين - بالقرب مني- بقرف و بعد انتهاء الفرقة من العرض قال لي الجالس بجواري مباشرة " أنت مدون ؟" قلتله "آه" فطلب مني أن يتعرف علي الفكرة و يقوم بإجراء حديث صحفي معي فسألته من أي الجرائد أنت فأجاب روزا ليوسف يالا الصاعقة من كل البشر التي تزدحم بهم القاعة لم يجدا سوي العبد الفقير لله ليجلسوا بجواره و يطلبوا رأيه لن أخذلهم و لكنني أردت أن تكون حفلة ساهرة تنافس الحفل الرئيسي الذي تجمعنا من أجله فأجبت بخبث و لكنني لأزال مدون مبتدئ فتعالا معي نبحث عن مجموعة من المدونين المخضرمين و أخذتهما للأفغاني الذي أتي بجمي و حاولنا مع مالك و لكنه لم يكن لديه وقت لحك أنفه من كثرة الملتفين حوله فأعطاهم رقم هاتفة و ذهبنا ثلاثتنا لكي نناقش هؤلاء الصحفيين إذا تغاضينا عن أحدهما الذي يشبه المخبرين أو علي أبسط تعبير أمين شرطة بالزى الملكي , و في البداية طبعا أبدينا جميعا استياء من روزا ليوسف فرد علينا بحكمة أعقلهم و إن كنت أشك في وجود من يحمل هذا اللقب بينهم " و متى كانت أخر مرة قرأت فيها روزا ليوسف " شخصيا من زمان جدا ( كنت أعتقد أنه يقصد المجلة ) و بعد عبارات كثيرة مثل " إزاي تحكم علي حاجة من غير متقرأها " اكتشفت إنه يتحدث عن الجريدة , فقلت له " لو معاك عدد من الجريدة طلعها و أنا أتنقدها نقد موضوعي " و بعد كثير من السفسطة قال " طيب يا جماعا تعالوا نقعد عشان نعرف نتكلم " و وافقنا و ذهبنا معه و جلسنا فسألته أين الجريدة و لكنه أخذ في السفسطة مرة أخري و كلام مثل إنتوا اللي بتعملوه ده مش مفيد و بعدين إنتوا بتهاجموا الجرنان من غير متقروه و الكلام ده و وجه كلامه للأفغاني و لكني لم أركز فيما قال فقد كنت أتابع جيمي و المخبر الأخر الذي يستحق لقب قفل بن أبي جهل و الاثنين مقطعين بعض في شد وجذب و طبعا كلام المخبر غير موضوعي بالمرة و يتهمه بأن المدونين ليس لهم هذه الأهمية و أنهم عالم فاضيه و بدل مهما قاعدين عواطلية مبيعملوش حاجة يروحوا يعملوا حاجة مفيدة و أل إيه كلكوا لابسين جينز و مطولين شعركوا ( يالا الهول هل صدر قانون يعاقب لابسي الجينز أم أن الحلاقين كسبوا القضية التي رفعوها ضدنا من أجل استرداد رزقهم الذي قطعناه بعدم حلاقة شعرنا ) و أيضا اتهمنا شوية تهم نقاوة زى إحنا واخدين حق مش من حقنا و قاعدين هنا ( في النقابة زى ميكون بنزاحمه في أكل عيشه مثلا ) و إننا نغذي الناس بالأكاذيب و هاج و ماج حتى أن جيمي إنسحب ( ليه حق في ألا يجادل جاهلا ) حاولت بعد إنسحاب جيمي أن أقنع المخبر أقصد الصحفي إننا لسنا خطرا عليه ولا علي أكل عيشه و إننا مصريين زينا زيه و مبنكرهش حد و بنحب كل المصريين فرفض رفضا قاطعا , و قال لي " إنتوا بتهاجموا عمال علي بطال قولي إيه اللي مش عاجبكم " رديت عليه " قوللي أنت إيه اللي صح في البلد ده و لو عايز تعرف وجهه نظري اسألني في موضوع محدد" فقال لي " لا قول أنت اللي مش عاجبك " و الله مش فاكر قلت موضوع إيه بس رد رد سفسطائي برضه مالوش لازمة فدخلت معاه علي الاقتصاد و ما حدث في البورصة المصرية من انهيار و خسارة الكثيرين من صغار المستثمرين أموال طائلة ( و أنا معاهم ) فجاءت الإجابة المعجزة " طيب حد قالهم يحطوا فلوسهم في البورصة " " يعني المطلوب مننا كمصريين إننا مندخلش أي مجال عشان البلد ماشية غلط , يعني العيب في الناس ديه مش العيب في النظام الاقتصادي المصري أنت بتقول إيه؟" " هو خلاص الاقتصاد المصري مفيهوش غير البورصة ما كانوا يستثمروا فلوسهم في حته تانية " و عبثا حاولت أن أشرح له النظام الاقتصادي دماغه ديه مصفحة أكتر من مدرعات الأمن المركزي , حينما سمع زميله بصوتي الذي أخذ في الصعود قال " سيبك منه و ركز معايا أنا إنتوا بقي إيه هي مصداقية الخبر اللي بتنقلوه للناس " يا صباح التخلف " يا عم إحنا مش وكالة أنباء إحنا بنعلق علي الأخبار اللي بتتنشر بنكتب اللي إحنا عايزينه إنشالله يكتب العال يا قوطة هو حر و إحنا مش مجموعة بنكتب كلنا زى بعض كل واحد بيكتب اللي عايزه " " طيب اللي بتكتبوه ده مش بيتنشر للناس و الناس بتقراه مش الفروض أنه يكون فيه مصداقية " " يا سيدي الفاضل كل واحد بيكتب اللي عايز يكتبه و هو حر و إننا في المقام الأول بننشد الحرية للكل يعني أنت لو جه حد كمم بقك عشان متقولش رأيك هنقف معاك لحد متعرف تقول رأيك مع أنك معارض لينا و بعدين محدش بيجبر حد أنه يقرأ حاجة مبجيش أقولك أدخل الصفحة ديه و شوف أنا كاتب إيه أنت دخلت أهلا بيك مدختلتش أنت حر" " طيب ما إنتوا بتنشروه علي النت عشان الناس تقرأه" " مبضربش حد علي إيده و أجبره أنه يقرأ أي حاجة اللي عايز يقرأ يقرأ و اللي مش عايز هو حر , و بعدين الموضوع ده عامل زى المذكرات اللي الناس بتكتبها و يعبروا فيها عن رأييهم " " بس الناس العاديين مبينشروش مذكراتهم و بيحتفظوا بيها لنفسهم إنتوا ليه بقي بتعملوا كده" " إحنا حرين و بعدين الراجل اللي بينشر مذكراته في كتاب ده بيجبرك أنك تشتريه إفرض أنا نشرت مذكراتي هل معني كده إنك لازم تشتريها , و بعدين سيبك من الموضوع ده وريني الجرنان " أخر ما أستطيع فعله لأتخلص من المناقشة العقيمة ديه إقناعه بإنني ألقي نظرة علي الجريدة فأخذ يقرأ لي الصفحة الأولي خبرا خبرا ( باين عليه مكنش مصدق إني بعرف أقرأ ) و ركز كثيرا علي كاريكاتير يهاجم إسرائيل و الحكومة بطريقة غير مباشرة بسبب مقتل أفراد الشرطة المصرية علي الحدود و رفض أن أخذ الجرنان و ألقي فيه نظرة لكي أبرز وجهة نظري فيه بحجة إنني سأركز علي السلبيات فقط أما هو فيبرز الإيجابيات إلي هنا بدأ الأفغاني في محاولة الانسحاب ( بدأ ياخد الراجل علي قد عقله و يهاوده ) و بعد ذلك أخذ يتحدث علي أن كل جريدة لها الحق في الاتجاه الذي تسلكه " أنت حر براحتك إنك تعمل دعاية و تدافع عن الحزب الوطني بس مين اللي بيمول الجرنان ده " " المجلس الأعلى للصحافة التابع لمجلس الشعب اللي أنا بعترف أنه بتاع الحكومة" " بس يا سيدي أنا عاوزك تقول كده من الصبح قول اللي أنت عاوزه طالما لا تمول الجريدة من أموال دافعي الضرائب المصريين " و بدأت في الانسحاب التدريجي و أعانني علي ذلك الأفغاني " آه يا عم الراجل جبهالك علي بلاطة " بس طبعا لسه شوية رغي علي غرار" إيه هي أيدلوجيتكوا " " ملناش أيديولوجية واحدة كل واحد حر" " طيب أيدلوجيتك أنت " " مفيش بني أدم عنده أيديولوجية محددة بينفذها بحزافيراها كل واحد ليه أيديولوجيته الخاصة بياخد من كل حاجة اللي بيناسبه " " طيب المعارضة اللي إنتوا بتتكلموا عليها ديه إنتوا عارفين بيعملوا إيه بالليل " "هما حرين يعملوا اللي يعملوه مش مشكلتنا " " طيب البديل " " الأفغاني : مخلاش فيه بدليل وقضي عليهم " " طيب ديه شطارة منه يعني كده هو الأحسن " " الأفغاني : يعني الواحد يدمر حزب الوفد و يسجن أيمن نور و ديه تبقي شطارة " " آه طبعا عرف يحافظ علي منصبه " فأجبت بثورة " يعني أروح أحط لرئيس الوزارا حشيش و أبلغ عنه و أوديه السجن ديه تبقي شطارة مني " فأجاب " آه لو تعرف اعملها " خلاص كفاية قوي علي كده طبعا أنا عارف طولت جدا في البوست ده بس كان لازم يتنشر وخصوصا عشان أخر جزء بالذات و عذرا إن كنت أطلت علي أحد ( و ربنا أنا مكتبتش نص الكلام و شايله في قلبي منهم لله الظلمة المفتريين هتجوز إزاي أنا بقي دلوقتي )