أي كلام و السلام

من أحسن الحاجات في المدونات إنك تقول إلي إنت عايزه و ده حاجة كويسة جدا لواحد زيي مبيتكلمش كتير و ساعات بحس إن الكلام مخنوق في زوري مش راضي يطلع و ساعات تانية بحس إني نسيت الكلام من كتر مبكون قاعد لوحدي لفترات طويلة مبكلمش حد لدرجة إن شفايفي بتنشف و تتجرح , بس كده عال قوي أنا ممكن أتكلم وأهبل زي ما أنا عايز و إيه يعني ما الكل بيهبل إشمعني أنا و هو الناس هتسيب اللي بيحصل في البلد و العالم و تقف عند هبلي أنا بس يعني شوطة الجزمة اللي ماشية في البلد مش هبل المتظاهرين يتضربوا بالجزمة و القضاة يتضربوا بالجزمة و الصحفين يتضربوا بالجزمة و طلعت السادات يقلع جزمته في مجلس الشعب لأحمد عز و مرتضي منصور يقلع الجزمة لأعضاء مجلس إدارة النادي الأهلي لدرجة إني حسيت إن اللي بني مصر كان في الأصل صرماتي لامؤاخذة يعني لإنتشار ظاهرة الجزمة و ما لها من مكانة في قلوب المصريين (قلوبهم و علي دماغهم أيضا) المهم هو موضوع الجزمة بس اللي هبل طيب ماهو البرانطعيق هبل برضه (بس هبل بتاعي و محدش يسألني عن معني كلمة البرانطعيق علشان أنا معرفش) ما علينا و لا زم الواحد ياخد باله كويس يعني علشان يستفيد من تجارب الأخرين يعني متكلش فول مدمس بالرز زي أنا معملت قبل كده من باب التجربة و منصحش بيها بالظبط زي البيض المقلي بالجوافة اللي برضه عملتها قبل كده بس اللي مجنني مش عارف ليه كانت طعمها وحش جدا و المربي بالطعمية برضه وحشة متكلوهاش و و الله لو فتحت موضوع الأكلات اللي بخترعها مش هخلص و الناس من يجيلها تلبك معوي علي السيرة بس , هو إيه اللي جاب سيرة الأكل أساسا مش عارف أهو أنا بهبل و السلام إزحين فجأة كده طلع في دماغي أتكلم تعبت من كتر ما أنا ساكت بس المشكلة الكبري إن الكلام مبيبعبرش عن الواحد أهه تنفيس يعني أنا دلوقتي بنفس و هيندهوا لبتاع الأنابيب يغيرني و الله الأنبوبة أنفع بكتير انا لو من أي حد كنت بدلتني بعلبة سلامون صفيح فاضية و تكون مخرومة و مصديه أهه تنفع و تكون أحسن مني بكتير علشان كده مينفعش وربنا لما البني أدم يكون ساقط كيك علي رأي صلاح السعدني في فيلم المركبي يبقي لازم يروح يعمل حاجة يعني مثلا أنا نفسي أروح الحاجر بلد أحمد زكي في فيلم الهروب الله لو رحت وعشت هناك حياة جديدة بعيد عن الخنقة و الزحمة و القرف و أكون جاهل أي نعم جاهل مبعرفش أقراء و لا أكتب علشان مشفش كتب و لا جرايد و لا كمبيوتر و لا برمجة و لا سياسة و لا إدارة أعمال و لا إقتصاد ولا أي حاجة معلش بقي بس و الله ساعات كتير الجهل بيكون نعمة يعني هخلص من الصداع المزمن و مكنة الطعمية اللي في دماغي اللي هرتني و مش هكون متصربع أتعلم الحاجة الفلانية و بعدين أحضر ماجستير في الحاجة العلانية و أمتحن في الكورسات الترتانية و إيه قبل إيه و إيه بعد إيه يعني الفتح قبل التسليك و الا التسليك بعد الفتح مش فاهم برضه ما علينا هعيش في الحاجر عيشة هنية مع ناس طيبين و هتجوز البت بهانة أي بهانة بنات الصعيد طيبين كلهم و كويسين و هزرع الأرض و أربي بهايم و أجيب عيال صغيرة معلمهمش برضه علشان ربنا يديم علينا نعمة الجهل بس في أخر الفيلم هكتشف إن الجمعية الزراعية فيها تلاعب و فشل إداري و إن النائب بتاع الدايرة متواطئ في تهريب الأثار و إن نظام الزراعة في البلد نظام بدائي فهبدأ أناقش في السياسة و أحاول الأقي حلول إقتصادية و إدارية علشان الجمعية الزراعية و أحاول أكشف للناس الفساد اللي حاصل في البلد و هحاول أغير نظام الزراعة و أعمل برنامج كمبيوتر لإدارة الأراضي الزراعية و مزارع المواشي و أحاول أعمل شركة أهلية علشان أجمع فلوس الناس و نعمل بيها مشروع كبير يبقي العائد بتاعه أكبر من لو كل واحد عمل حاجة لوحده و بعدين معرفش أعمل أي حاجة من الحاجات ديه أسفآ فهرجع تاني هنا لأنها هي هي مش فارقة المكان اللي الواحد بيقعد فيه مدامت كل حاجة حوالين الواحد منيلة بستين نيلة و هباب و قطران و قرف و عك و زفت